Itago Mo Pang Mabuti

Isang pagnanasa ang alamin lahat
Kwento, ideya, lihim at nakaraan
Nakatago man sa ilalim ng balat
Hahalukayin upang ito'y malaman

Sakit, hapdi at lumbay aking nakamit
Sa katotohanang minsan nakakubli
Na minsang sa liham lamang nakakabit
Pagtarak ng punyal sa puso ang sukli

Ngayon ko lamang hindi napaghandaan
'Di rin napansin kahit isang senyales
Imaheng tinago'y aking nasilayan
Mahapdi sa mata ang nakitang pares

Anong magagawa sa 'yong nakaraan
Kung ito'y ituring, ginto bang halaga
Binubuo pa lang 'tong kasalukuyan
Alin kaya ang may higit na alaga

Kasalukuya'y ano naman ang laban
O kailangan pa bang pinag-iisipan
Na may nagaganap na ngang tunggalian
Sa gitna ng panaho't pag-iibigan

Mga katotohanang ibinabaon
Pilit na pumipiglas sa'king harapan
Siguraduhin, maingat mong ikahon
Upang sa sakit, di ako magulantang

'Di naman nasa na ikaw'y lumimot
Nais lamang ng puso ay maramdaman
Ikaw'y lumaya na't di mag-iimbot
Sa katotohanang aking karapatan