Balik Bisyo

isipang tuyot

diniligan ng luha

nagbunga'y puot

libog ng puso

nagparaos sa panglaw

ganting kay tuso

lunod sa alak

lumalangoy sa pait

hapong halakhak

yosing naupos

nababangag sa usok

buga'y pinuspos

bisyo kong hilig

hayaang mabalikan

muling umibig

Pintig

Maitatago kaya ng mga palad
Habang ang mga damdami'y nakasalop
Pilit mang pigilin itong paglaladlad
Pusong ikaw lamang mag-isang sumakop

Maililunok kaya ng buong buo
Pait ng pagkamanhid at pagiimbot
Umaapaw na libog at pagluluho
Humihiyaw ng kalungkutan at puot

Matatalisod, matatanga pang muli
Sa uyayi ng pag-ibig, pag-iinit
Pagbuhos, pagsabog habang tumitili
Tumitirik sa sarap na nakakamit